ଗୃହ ବାହାରେ ବି ମଣ୍ଡି ତାତି : ତିନି ଦଳ କଥା କଟାକଟି
-ତିନି ମନ୍ତ୍ରୀ କ୍ଷମା ମାଗନ୍ତୁ : କଂଗ୍ରେସ
-ସୁବାଷ ପାଣିଗ୍ରାହୀ କାହିଁକି କ୍ଷମା ମାଗିବେ : ବିଜେପି
– ଆତ୍ମହତ୍ୟା ଉଦ୍ୟମ କଳଙ୍କିତ ଅଧ୍ୟାୟ ସୃଷ୍ଟି କରିବ: ବିଜେଡି
ଭୁବନେଶ୍ୱର : ମଣ୍ଡି ସମସ୍ୟାକୁ ନେଇ ଗୃହ ଭିତରେ ତାତି ଦେଖା ଦେଇଥିଲାବେଳେ ଗୃହ ବାହାରେ ବି ଉଷ୍ଣତା ଦେଖାଯାଇଥିଲା । ତିନି ଦଳର ନେତା କଥା କଟାକଟି ହୋଇଥିଲେ । କଂଗ୍ରେସ ଦଳର ମୁଖ୍ୟ ସଚେତକ ତାହା ପ୍ରସାଦ ବାହିନିୀପତି ଗୃହ ବାହାରେ କହିଥିଲେ, ଆଲୋଚନା ମାଧ୍ୟମରେ ଏହାର ସମାଧାନ ନକରି ଗୃହର ମଧ୍ୟଭାଗକୁ ତିନି ମନ୍ତ୍ରୀ ଆସିବା ଠିକ୍ ନୁହେଁ । ମନ୍ତ୍ରୀମାନେ କ୍ଷମା ନମାଗିବା ପର୍ଯ୍ୟନ୍ତ ଗୃହ ଚଲାଇ ଦେବୁନାହିଁ । ବିଜେପି ସଦସ୍ୟ ମୋହନ ମାଝୀ ଗୃହ ବାହାରେ କହିଛନ୍ତି ଯେ, ବିଧାନସଭା ପରମ୍ପରା ପ୍ରଥମେ ଶାସକ ଦଳ ଭାଙ୍ଗିଛି । ସେମାନେ କ୍ଷମା ମାଗନ୍ତୁ । ଚାଷୀ ସମସ୍ୟା ଯେଉଁ ପର୍ଯ୍ୟନ୍ତ ସମାଧାନ ନହୋଇଛି ଆନ୍ଦୋଳନ ଚାଲିବ । ମନ୍ତ୍ରୀମାନେ ଗୃହ ମଧ୍ୟଭାଗକୁ ଆସିଥିବା ସେ ଅଭିଯୋଗ କରିବା ସହ ସୁବାଷ ପାଣିଗ୍ରାହୀ କାହିଁକି କ୍ଷମା ମାଗିବେ ବୋଲି ପାଲଟା ପ୍ରଶ୍ନ କରିଛନ୍ତି ।
ଅପରପକ୍ଷରେ ବିଜେଡି ସଦସ୍ୟ ପ୍ରତାପ କେଶରୀ ଦେବ୍ ଗୃହ ବାହାରେ ଗଣମାଧ୍ୟମକୁ କହିଥିଲେ, ବିଧାୟକଙ୍କ ଆତ୍ମହତ୍ୟା ଉଦ୍ୟମକୁ ବିଜେଡି ନିନ୍ଦା କରୁଛି । ସେ କ୍ଷମା ମାଗନ୍ତୁ ବୋଲି ବାଚସ୍ପତିଙ୍କ ନିକଟରେ ଦାବି କରାଯାଇଛି । ଆଜି ପର୍ଯ୍ୟନ୍ତ କୌଣସି ବିଧାୟକ ଆତ୍ମହତ୍ୟା ଉଦ୍ୟମ କଲାଭଳି ପଦକ୍ଷେପ ନେଇନାହାନ୍ତି । ଏହା ଏକ କଳଙ୍କିତ ଅଧ୍ୟାୟ ସୃଷ୍ଟି କରିବ ଓ ବିଜେପିର ଦଳୀୟ ପ୍ରରୋଚନାରେ ଏଭଳି କରାଯାଇଛି ନା ଏହା ବିଧାୟକଙ୍କ ବ୍ୟକ୍ତିଗତ ଉଦ୍ୟମ ତାହା ପ୍ରଥମେ ବିଜେପି ସ୍ପଷ୍ଟ କରୁ । ଏଭଳି ଘଟଣାଲାଗି ସେ କ୍ଷମା ମାଗନ୍ତୁ । ଯଦି ତାହା କରାନଯାଏ ବିଜେଡି ତା’ ଦାବିରେ ଅଟଳ ରହିବ । ପ୍ରତିବାଦ କରିବାର ବିଭିନ୍ନ ଉପାୟ ରହିଛି । ହେଲେ ସାନିଟାଇଜର ପିଇ ବିଧାୟକ କ’ଣ ପ୍ରମାଣିତ କରିବାକୁ ଚାହିଁଛନ୍ତି ଯେ, କାମ ନହେଲେ ଆତ୍ମହତ୍ୟା କର । ଏହା ଆଦୌ ଗ୍ରହଣୀୟ ନୁହେଁ ବୋଲି ଶ୍ରୀ ଦେବ୍ କହିଛନ୍ତି ।
