ଧରାହେଲେ ଡାକ ମାଷ୍ଟର
ମାଲକାନଗିରି: ମାଲକାନଗିରି ଜିଲ୍ଲା କାଲିମେଳା ଥାନା ଅନ୍ତର୍ଗତ ଭେଜାଙ୍ଗିୱାଡା ଠାରେ ଥିବା ଡାକଘରର ଡାକପାଳ ସଞ୍ଚୟ ଅର୍ଥ ଲୁଟ୍ ଓ ଆତ୍ମସାତ ଅଭିଯୋଗରେ ପୁଲିସ ଗିରଫ କରିଛି । ଏମ୍ପିଭି -୭୧ ଗ୍ରାମର ନନି ଗୋପାଳ ବିଶ୍ୱାସ ଓ ତାଙ୍କ ପତ୍ନୀ ୨୦୧୫ ମସିହାରେ ଭେଜାଙ୍ଗୱାଡାର ଡାକଘର ଶାଖାରେ ସଞ୍ଚୟ ଖାତା ଖୋଲି ମୋଟ୍ ୨୫ ହଜାର ଟଙ୍କା ଜମା କରିବା ସହ ପରବର୍ତ୍ତୀ ସମୟରେ ୮୦ ହଜାର ଟଙ୍କା ଜମା କରିଥିଲେ । ପରେ ଗତ ୨୦୧୮ ମସିହାରେ ପୁଣି ଏକ ଆରଡି ଖାତା ଖୋଲି ୨୦ ହଜାର ଟଙ୍କା ଜମା କରିଥିଲେ । ପରେ ଶ୍ରୀ ବିଶ୍ୱାସ କାଲିମେଳା ଉପ ଡାକଘରକୁ ଯାଇ ଭେଜାଙ୍ଗିୱାଡ଼ା ଡାକଘର ଶାଖାରେ ତାଙ୍କର ଏବଂ ତାଙ୍କ ପତ୍ନୀଙ୍କ ଆକାଉଣ୍ଟ ଯାଞ୍ଚ କରିବାରୁ ତାଙ୍କର ମାତ୍ର ୩୧୬୩ ଟଙ୍କା ଥିବା ଜାଣିବାକୁ ପାଇଥିଲେ ।
ଅନ୍ୟ ଆକାଉଣ୍ଟଗୁଡିକ ଡାକଘର ଶାଖାରେ ନଥିବା ଜାଣିବାକୁ ପାଇଥିଲେ । ଏହି ଅର୍ଥ ଭେଜାଙ୍ଗୱାଡା ଶାଖାର ଡାକପାଳ ମନ ପୂଜାରି ଆତ୍ମସାତ କରିଥିବା ଜାଣିବାକୁ ପାଇ କାଲିମେଳା ଥାନାରେ ଏକ ମାମଲା ରୁଜ୍ଜୁ କରିଥିଲେ । ଏ ସମ୍ପର୍କରେ କାଲିମେଳା ପୁଲିସ କେସ୍ ନମ୍ବର ୧୩୦ରେ ଏକ ମାମଲା ରୁଜୁକରି ତଦନ୍ତ ଆରମ୍ଭ କରିଥିଲା । କାଲିମେଳା ପୁଲିସ ଡାକପାଳ ଶ୍ରୀ ପୂଜାରୀକୁ ଗିରଫ କରି କୋର୍ଟ ଚାଲାଣ କରିଛି । ତେବେ ଏଥିପୂର୍ବରୁ ମଧ୍ୟ ଅଭିଯୁକ୍ତ ଅର୍ଥ ଲୁଟ୍ ଓ ଆତ୍ମସାତ୍ କରିଥିବା ଅଭିଯୋଗରେ କାଲିମେଳା ଥାନାକେସ୍ ନମ୍ବର ୪୯ ରେ ମାମଲା ରୁଜ୍ଜୁ ହୋଇଥିବା କାଲିମେଳା ଥାନା ଭାରପ୍ରାପ୍ତ ନିରୀକ୍ଷକ ଜଗଦ୍ଦୀଶ ବାରା କହିଛନ୍ତି ।
