ବେଙ୍ଗାଲୁରୁରେ ଦେବଦୂତ ସାଜିଛନ୍ତି ଓଡ଼ିଆ ଯୁବକ
କଟକ : କରୋନା ମହାମାରୀରେ ବହୁ ଆକ୍ରାନ୍ତ ହେଉଥିବାବେଳେ ଅନେକଙ୍କ ମୃତ୍ୟୁ ଘଟୁଛି। ଏଭଳି ସମୟରେ ରାଜ୍ୟ ବାହାରେ ବା ବେଙ୍ଗାଲୁରୁରେ ରହୁଥିବା ଓଡ଼ିଆଙ୍କ ପାଇଁ ଦେବଦୂତ ସାଜିଛନ୍ତି କଟକର ପୁଅ ଆଦିତ୍ୟ ପାଢୀ। କୌଣସି ସାମାଜିକ ସଙ୍ଗଠନ କିମ୍ବା ବ୍ୟକ୍ତିଙ୍କ ଠାରୁ ସହାୟତା ନ ନେଇ ସେ କରୋନା ଆକ୍ରାନ୍ତ ହେଉଥିବା ଓଡ଼ିଆଙ୍କୁୁ ଯୋଗାଉଛନ୍ତି ଖାଦ୍ୟ ଏବଂ ଅମ୍ଳଜାନ ସିଲିଣ୍ଡର। କରୋନା ଯୋଗୁ ରୋଜଗାର ହରାଇଥିବା ବହୁ ଓଡ଼ିଆ ପରିବାରଙ୍କୁ ସେ ଖାଦ୍ୟ ସାମାଗ୍ରୀ ଯୋଗାଉଥିବା ବେଳେ ଶହଶହ କରୋନାରେ ଗୁରୁତର ଭାବେ ଚିକିତ୍ସିତ ହେଉଥିବା ଓଡ଼ିଆ ବ୍ୟକ୍ତିଙ୍କୁ ଅକ୍ସିଜେନ ଯୋଗାଇଛନ୍ତି। ଆଦିତ୍ୟଙ୍କ ଘର ବାରବାଟୀ ଦୁର୍ଗ କିଲ୍ଲା ଫୋର୍ଟ ଅଞ୍ଚଳରେ। ସେ ଦୀର୍ଘ ୨୨ ବର୍ଷ ହେବ ବେଙ୍ଗାଲୁରୁ ନର୍ଥ କେ. ଆରପୁରମ ଅଞ୍ଚଳରେ ରହୁଛନ୍ତି। ସେ ଜଣେ ଯୁବ ଶିଳ୍ପୋଦ୍ୟଗୀ। ଏକ ସଫ୍ଟ ୱେୟାର ସଂସ୍ଥା ଚଳାଉଛନ୍ତି।
