ଆବୁ ଧାବିରେ ପ୍ରବାସୀ ଓଡ଼ିଆ ସମାଜର ରଜ ଉତ୍ସବ ୨୦୨୬

ଆବୁ ଧାବିରେ ପ୍ରବାସୀ ଓଡ଼ିଆ ସମାଜର “ରଜ ଉତ୍ସବ ୨୦୨୬”

ଆବୁଧାବି/ଭୁବନେଶ୍ୱର ୨୨-୦୬-୨୦୨୬(ବି .ଏନ .ଓ ) : (ରିପୋର୍ଟ: ବିଶ୍ୱ ରଞ୍ଜନ):- ପ୍ରବାସୀ ଓଡ଼ିଆ ସମାଜ ଆବୁ ଧାବି (POSA) ପକ୍ଷରୁ ରାଜଧାନୀ ଆବୁ ଧାବିରେ ରଜ ଉତ୍ସବ ୨୦୨୬ ଉତ୍ସାହ ଓ ଉଦ୍ଦୀପନାର ସହ ପାଳିତ ହୋଇଯାଇଛି। ଏହି ଅବସରରେ ସଂଯୁକ୍ତ ଆରବ ଏମିରେଟ୍ସର ବିଭିନ୍ନ ସ୍ଥାନରୁ ଆସିଥିବା ଶତାଧିକ ଓଡ଼ିଆ ପରିବାର ଏକତ୍ରିତ ହୋଇ ରଜ ପର୍ବର ଆନନ୍ଦ ଉପଭୋଗ କରିଥିଲେ। କାର୍ଯ୍ୟକ୍ରମର ଶୁଭାରମ୍ଭ ମଙ୍ଗଳାଚରଣ ଓ ପାରମ୍ପରିକ ରୀତିନୀତି ସହ ହୋଇଥିଲା। ଏହାପରେ ରଜ ପର୍ବର ଐତିହ୍ୟ, ନାରୀତ୍ୱର ସମ୍ମାନ, ପ୍ରକୃତି ପ୍ରତି କୃତଜ୍ଞତା ଏବଂ ଓଡ଼ିଆ ସଂସ୍କୃତିରେ ଏହାର ଅନନ୍ୟ ସ୍ଥାନ ସମ୍ପର୍କରେ ଆଲୋକପାତ କରାଯାଇଥିଲା। ଉତ୍ସବରେ ଶିଶୁ, ଯୁବକ ଓ ବୟସ୍କମାନଙ୍କ ଦ୍ୱାରା ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ, ନୃତ୍ୟ, ସଙ୍ଗୀତ ଓ ରଜଗୀତ ପରିବେଷଣ କରାଯାଇଥିଲା। ଓଡ଼ିଶାର ପ୍ରମୁଖ ପର୍ବପର୍ବାଣୀ ଯଥା ରଥଯାତ୍ରା, ନୂଆଖାଇ, ଦୁର୍ଗାପୂଜା, ମାଣବସା ଗୁରୁବାର, କୁମାର ପୂର୍ଣ୍ଣିମା, ପ୍ରଥମାଷ୍ଟମୀ ଓ ରଜ ପର୍ବ ଉପରେ ଆଧାରିତ ନୃତ୍ୟାନୁଷ୍ଠାନ ଦର୍ଶକମାନଙ୍କ ମନ ଜିଣିଥିଲା।

ରଜ ଉପଲକ୍ଷେ ପାରମ୍ପରିକ ପିଠା ପ୍ରତିଯୋଗିତା, ମହିଳାମାନଙ୍କ ପାଇଁ ସଜବାଜ ପ୍ରତିଯୋଗିତା ଏବଂ ଶିଶୁମାନଙ୍କ ପାଇଁ ବିଭିନ୍ନ ମନୋରଞ୍ଜନଧର୍ମୀ କାର୍ଯ୍ୟକ୍ରମର ଆୟୋଜନ ହୋଇଥିଲା। ପାରମ୍ପରିକ ଓଡ଼ିଆ ପିଠା ଓ ଖାଦ୍ୟର ସ୍ୱାଦ ଉପସ୍ଥିତ ଅତିଥିମାନଙ୍କୁ ନିଜ ମାଟିର ସ୍ମୃତିକୁ ଫେରାଇ ନେଇଥିଲା।ଏହି ବୃହତ୍ ସାଂସ୍କୃତିକ ଆୟୋଜନର ସଫଳତା ପଛରେ POSA ର ସକ୍ରିୟ କାର୍ଯ୍ୟକାରିଣୀ ସଦସ୍ୟ ଶ୍ରୀ ସତ୍ୟଜିତ ସାହୁ, ଶ୍ରୀମତୀ ଶିବାନୀ କର, ଶ୍ରୀ ସୂରଜ କୁମାର ପରିଡ଼ା, ଶ୍ରୀ ପ୍ରଭାତ ଗିରି, ଶ୍ରୀ ରାକେଶ ସାହୁ ଓ ଶ୍ରୀ ପ୍ରକାଶ ମିଶ୍ରଙ୍କ ଉଲ୍ଲେଖନୀୟ ଭୂମିକା ରହିଥିଲା। ସଂଗଠନର ପରାମର୍ଶଦାତା ଶ୍ରୀ ଜ୍ଞାନ ମହାନ୍ତି, ଶ୍ରୀମତୀ ମୌସୁମୀ ମହାନ୍ତି ଏବଂ ଶ୍ରୀ ସୁଶିମ ଅମିତାଭ ସ୍ୱାଇଁ ଏହି ଆୟୋଜନକୁ ସଫଳ କରିବାରେ ମାର୍ଗଦର୍ଶନ ଓ ସହଯୋଗ ପ୍ରଦାନ କରିଥିଲେ।

ବିଶେଷ କରି ମଞ୍ଚ ପରିଚାଳନା ଓ ସମନ୍ୱୟ ଦାୟିତ୍ୱକୁ ଶ୍ରୀ ସୂରଜ କୁମାର ପରିଡ଼ା ଓ ଶ୍ରୀମତୀ ଶିବାନୀ କର ଦକ୍ଷତାର ସହ ପରିଚାଳନା କରି କାର୍ଯ୍ୟକ୍ରମକୁ ସୁଚାରୁ ଓ ଆକର୍ଷଣୀୟ କରିଥିଲେ। POSA ର କର୍ମକର୍ତ୍ତାମାନେ କହିଥିଲେ ଯେ, ପ୍ରବାସରେ ରହୁଥିବା ନୂତନ ପିଢ଼ିଙ୍କ ମଧ୍ୟରେ ଓଡ଼ିଆ ଭାଷା, ସଂସ୍କୃତି ଓ ପରମ୍ପରା ପ୍ରତି ଆଗ୍ରହ ସୃଷ୍ଟି କରିବା ଏବଂ ସମାଜ ମଧ୍ୟରେ ଏକତା ଓ ଭାତୃତ୍ୱ ଭାବ ବୃଦ୍ଧି କରିବା ଏହିଭଳି ଆୟୋଜନର ମୂଳ ଉଦ୍ଦେଶ୍ୟ। ପରିଶେଷରେ ସମସ୍ତ ଅତିଥି, ଅଂଶଗ୍ରହଣକାରୀ, ଏବଂ POSA ପରିବାରର ସମସ୍ତ ସଦସ୍ୟଙ୍କୁ ଧନ୍ୟବାଦ ଜଣାଇ କାର୍ଯ୍ୟକ୍ରମର ସମାପନ କରାଯାଇଥିଲା।